ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ 20 ਜਨਵਰੀ (ਮੰਗਤ ਸਿੰਘ ਸੈਦਪੁਰ/ਜੀਵਨ ਭਾਗੀ) : ਪੰਜਾਬ ‘ਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਆਰੰਭ ਕੀਤੀ ਭਰਿਸ਼ਟਾਚਾਰ ਅਤੇ ਰਿਸ਼ਵਤ ਖੋਰੀ ਵਿਰੁੱਧ ਮੁਹਿੰਮ ਤਹਿਤ ਵਿਜੀਲੈਂਸ ਅਤੇ ਪੰਜਾਬ ਪੁਲਿਸ ਵੱਲੋਂ ਵੱਡੇ ਪੱਧਰ ਤੇ ਗਲਤ ਅੰਸਰਾਂ ਵਿਰੁੱਧ ਕਾਰਵਾਈਆਂ ਕੀਤੀਆਂ ਜਾ ਰਹੀਆਂ ਹਨ। ਇਸੇ ਸੰਬੰਧ ਚ ਐੱਸ ਐੱਸ ਪੀ ਦੀਪਕ ਪਾਰਿਕ ਨੇ ਪ੍ਰੈੱਸ ਨੂੰ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਸ਼੍ਰੀ ਗੌਰਵ ਯਾਦਵ ਆਈ.ਪੀ.ਐਸ. ਡੀ.ਜੀ.ਪੀ. ਪੰਜਾਬ, ਸ਼੍ਰੀ ਹਰਚਰਨ ਸਿੰਘ ਭੁੱਲਰ, ਆਈ.ਪੀ.ਐਸ. ਡੀ.ਆਈ.ਜੀ. ਰੋਪੜ ਰੇਂਜ, ਰੋਪੜ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਮੋਹਾਲੀ ਪੁਲਿਸ ਨੇ ਪੰਜਾਬ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਵਿੱਚ ਲੁੱਟ-ਖੋਹ ਅਤੇ ਫਰੌਤੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਗੈਂਗਸਟਰ ਲਖਵੀਰ ਸਿੰਘ ਲੰਡਾ ਅਤੇ ਗੁਰਦੇਵ ਸਿੰਘ ਉਰਫ ਜੱਸਲ ਉਰਫ ਜੈਸਲ ਦੇ 02 ਗੁਰਗਿਆਂ ਨੂੰ ਨਜਾਇਜ਼ ਹਥਿਆਰਾਂ ਸਮੇਤ ਗ੍ਰਿਫਤਾਰ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ। ਐੱਸ ਐੱਸ ਪੀ ਦੀਪਕ ਪਾਰਿਕ, ਨੇ ਜਾਣਕਾਰੀ ਦਿੰਦੇ ਅੱਗੇ ਦੱਸਿਆ ਕਿ ਮਿਤੀ 08-01-2025 ਨੂੰ ਏਕਮਦੀਪ ਸਿੰਘ ਬਰਾੜ ਪੁੱਤਰ ਪੁਸ਼ਪਿੰਦਰ ਸਿੰਘ ਬਰਾੜ ਵਾਸੀ ਪਟਿਆਲਾ, ਆਪਣੇ ਦੋਸਤ ਨਾਲ ਉਸਦੀ ਕਾਰ ਨੰ: ਪੀ.ਬੀ.34-ਬੀ-2354 ਮਾਰਕਾ ETIOS LIVA ਤੇ ਸਵਾਰ ਹੋ ਕੇ ਪਟਿਆਲਾ ਤੋਂ ਚੰਡੀਗੜ੍ਹ ਵੱਲ ਜਾ ਰਹੇ ਸੀ ਤਾਂ 03 ਨਾ-ਮਾਲੂਮ ਲੜਕੇ ਉਹਨਾਂ ਦਾ ਪਿੱਛਾ ਕਰ ਰਹੇ ਸਨ ਜਿਹਨਾਂ ਨੇ ਏਅਰਪੋਰਟ ਰੋਡ ਤੇ ਜੀ.ਐਮ.ਆਈ (GMI) ਬੋਰਡ ਕੋਲ ਉਹਨਾਂ ਦੀ ਗੱਡੀ ਅੱਗੇ ਮੋਟਰਸਾਇਕਲ ਲਾ ਕੇ ਆਪਣੇ ਨਜਾਇਜ ਹਥਿਆਰਾਂ ਨਾਲ ਜਾਨੋਂ ਮਾਰਨ ਦੀ ਨੀਅਤ ਅਤੇ ਕਾਰ ਖੋਹਣ ਲਈ ਉਹਨਾਂ ਤੇ ਸਿੱਧੀ ਫਾਇਰਿੰਗ ਕਰ ਦਿੱਤੀ, ਜੋ ਇੱਕ ਫਾਇਰ ਉਸਦੇ ਕਨੈਕਟਰ ਸਾਈਡ ਬੈਠੇ ਦੋਸਤ ਦੇ ਖੱਬੇ ਮੋਢੇ ਪਰ ਵੱਜਿਆ ਅਤੇ ਇੱਕ ਫਾਇਰ ਉਸਦੀ ਪਿੱਠ ਤੇ ਅਤੇ ਬਾਕੀ ਫਾਇਰ ਗੱਡੀ ਤੇ ਲੱਗੇ। ਇਸ ਤੋਂ ਬਾਅਦ ਇਹ ਵਿਅਕਤੀ ਮੋਟਰਸਾਇਕਲ ਤੇ ਫਰਾਰ ਹੋ ਗਏ, ਜਿਸ ਤੇ 03 ਨਾ-ਮਾਲੂਮ ਵਿਅਕਤੀਆਂ ਦੇ ਖਿਲਾਫ ਮੁੱਕਦਮਾ ਨੰਬਰ 05 ਮਿਤੀ 08.01.2025 ਅ/ਧ 109, 126 (2), 3 (5) ਬੀ.ਐੱਨ.ਐੱਸ ਅਤੇ 25-54-59 ਆਰਮਜ਼ ਐਕਟ ਥਾਣਾ ਆਈ.ਟੀ.ਸਿਟੀ ਦਰਜ ਕੀਤਾ ਗਿਆ। ਉਕਤ ਵਾਰਦਾਤ ਨੂੰ ਟਰੇਸ ਕਰਨ ਲਈ ਸ੍ਰੀਮਤੀ ਜੋਤੀ ਯਾਦਵ ਆਈ.ਪੀ.ਐਸ. ਕਪਤਾਨ ਪੁਲਿਸ (ਇੰਨਵੈਸਟੀਗੇਸ਼ਨ), ਸ਼੍ਰੀ ਤਲਵਿੰਦਰ ਸਿੰਘ ਪੀ.ਪੀ.ਐਸ. ਉਪ-ਕਪਤਾਨ ਪੁਲਿਸ (ਇੰਨਵੈਸਟੀਗੇਸ਼ਨ) ਦੀ ਨਿਗਰਾਨੀ ਹੇਠ ਇੰਸ: ਹਰਮਿੰਦਰ ਸਿੰਘ ਇੰਚਾਰਜ ਸੀ.ਆਈ.ਏ. ਸਟਾਫ ਦੀ ਟੀਮ ਬਣਾਈ ਗਈ। ਜਿਸ ਤੇ ਟੀਮ ਵੱਲੋਂ ਕੜੀ ਨਾਲ ਕੜੀ ਜੋੜਦੇ ਹੋਏ ਟੈਕਨੀਕਲ ਅਤੇ ਹਿਊਮਨ ਸੋਰਸਾਂ ਦੀ ਮਦਦ ਨਾਲ ਦੋਸ਼ੀਆਂ ਦਾ ਪਿੱਛਾ ਕਰਦੇ ਹੋਏ, ਮੁਕੱਦਮਾ ਵਿੱਚ 03 ਨਾ-ਮਾਲੂਮ ਦੋਸ਼ੀਆਂ ਨੂੰ ਨਾਮਜਦ ਕਰਕੇ 02 ਦੋਸ਼ੀਆਂਨ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਜਿਨਾਂ ਵਿੱਚ ਦੋਸ਼ੀ ਅਵਤਾਰ ਸਿੰਘ ਉਰਫ ਵਿੱਕੀ ਪੁੱਤਰ ਮੁਖਵਿੰਦਰ ਸਿੰਘ ਵਾਸੀ ਪੱਤੀ ਗੁਰਮੁੱਖਾਂ ਦੀ ਪਿੰਡ ਖਡੂਰ ਸਾਹਿਬ, ਥਾਣਾ ਗੋਇੰਦਵਾਲ ਸਾਹਿਬ, ਜ਼ਿਲ੍ਹਾ ਤਰਨਤਾਰਨ ( ਉਮਰ 21 ਸਾਲ, ਬਾਰਵੀਂ ਪਾਸ, ਗ੍ਰਿਫਤਾਰੀ ਮਿਤੀ 15-01-2025)। ਦੋਸ਼ੀ ਅਮਰਵੀਰ ਸਿੰਘ ਪੁੱਤਰ ਜਤਿੰਦਰ ਸਿੰਘ ਵਾਸੀ ਡੱਫਰ ਕੀ ਪੱਤੀ ਪਿੰਡ ਖਡੂਰ ਸਾਹਿਬ, ਜ਼ਿਲ੍ਹਾ ਤਰਨਤਾਰਨ, ( ਉਮਰ 20 ਸਾਲ, ਗਿਆਂਰਵੀ ਪਾਸ, ਗ੍ਰਿਫਤਾਰੀ ਮਿਤੀ 15-01-2025) 3. ਅਨਮੋਲ ਸਿੰਘ ਉਰਫ ਮੌਲਾ ਪੁੱਤਰ ਹਰਜਿੰਦਰ ਸਿੰਘ ਵਾਸੀ ਪਿੰਡ ਵਾੜਿੰਗ ਸੂਬਾ ਸਿੰਘ, ਜ਼ਿਲ੍ਹਾ ਤਰਨਤਾਰਨ ਦੀ ਗ੍ਰਿਫਤਾਰੀ ਬਾਕੀ ਹੈ। ਇਹਨਾਂ ਦੋਸ਼ੀਆਂ ਕੋਲੋਂ 03 ਪਿਸਟਲ 32 ਬੋਰ ਸਮੇਤ 09 ਰੌਂਦ ਜਿੰਦਾਂ 32 ਬੋਰ, 01 ਦੇਸੀ ਪਿਸਤੌਲ .32 ਬੋਰ ਸਮੇਤ 02 ਕਾਰਤੂਸ, 01 ਦੇਸੀ ਪਿਸਤੌਲ 315 ਬੋਰ ਸਮੇਤ 02 ਕਾਰਤੂਸ ਅਤੇ ਥਾਣਾ ਸਾਹਨੇਵਾਲ, ਕਮਿਸ਼ਨਰੇਟ ਲੁਧਿਆਣਾ ਤੋਂ ਖੋਹ ਕੀਤੀ ਕਾਰ ਮਾਰਕਾ ਬਰੀਜਾ ਨੰ : ਪੀ.ਬੀ.91-ਜੀ-4016 ਹੈ। ਖਾਸ ਗੱਲ ਇਹ ਹੈ ਕਿ ਦੋਸ਼ੀਆਂਨ ਦੀ ਪੁੱਛਗਿੱਛ ਤੇ ਖੁਲਾਸਾ ਹੋਇਆ ਕਿ ਦੋਸ਼ੀ ਪਹਿਲਾਂ ਵੀ ਅੱਡ-ਅੱਡ ਮੁਕੱਦਮਿਆਂ ਵਿੱਚ ਥਾਣਾ ਗੋਇੰਦਵਾਲ ਸਾਹਿਬ ਜ਼ਿਲ੍ਹਾ ਤਰਨਤਾਰਨ ਅਤੇ ਥਾਣਾ ਕਰਤਾਰਪੁਰ, ਜ਼ਿਲ੍ਹਾ ਜਲੰਧਰ ਦਿਹਾਤੀ ਵਿੱਚ ਲੋੜੀਂਦੇ ਹਨ। ਦੋਸ਼ੀਆਂ ਨੇ ਆਪਣੀ ਪੁੱਛਗਿੱਛ ਦੌਰਾਨ ਮੰਨਿਆ ਕਿ ਉਹ ਮਿਤੀ 07-01-2025 ਨੂੰ ਤਰਨਤਾਰਨ ਤੋਂ ਬੱਸ ਵਿੱਚ ਸਵਾਰ ਹੋ ਕੇ ਵਾਰਦਾਤਾਂ ਕਰਨ ਦੀ ਤਾਂਗ ਵਿੱਚ ਰਾਜਪੁਰਾ, ਜ਼ਿਲ੍ਹਾ ਪਟਿਆਲਾ ਅਤੇ ਮੋਹਾਲੀ ਆਏ ਸਨ। ਇਸ ਤੋਂ ਬਾਅਦ ਦੋਸ਼ੀਆਂ ਨੇ ਨਿਮਨਲਿਖਤ ਅਨੁਸਾਰ ਵਾਰਦਾਤਾਂ ਨੂੰ ਅੰਜਾਮ ਦਿੱਤਾ।
ਸਭ ਤੋਂ ਪਹਿਲਾਂ ਤਿੰਨੋਂ ਦੋਸ਼ੀਆਂਨ ਨੇ ਰਾਜਪੁਰਾ-ਅੰਬਾਲਾ ਰੋਡ ਤੇ ਪਿੰਡ ਗੰਡਿਆਂ ਕੱਟ ਤੋਂ ਦਲੇਰ ਸਿੰਘ ਵਾਸੀ ਪਿੰਡ ਸੈਲਫਪੁਰ ਤੋਂ ਜੋ ਕਿ ਆਪਣੇ ਸੌਹਰੇ ਪਿੰਡ ਤੋਂ ਪਿੰਡ ਬਠੌਣੀਂ ਨੂੰ ਵਕਤ ਕ੍ਰੀਬ 12:10 ਏ.ਐਮ. ਤੇ ਜਾ ਰਿਹਾ ਸੀ, ਉਸਨੂੰ ਘੇਰਕੇ, ਆਪਣੇ ਨਜਾਇਜ ਹਥਿਆਰਾਂ ਨਾਲ ਹਵਾਈ ਫਾਇਰ ਕਰਕੇ ਅਤੇ ਉਸਦੀ ਕੁੱਟਮਾਰ ਕਰਕੇ, ਉਸਦਾ ਸਪਲੈਂਡਰ ਮੋਟਰਸਾਈਕਲ ਨੰ: ਪੀ.ਬੀ.23-ਵਾਈ-8449 ਖੋਹ ਕਰ ਕੀਤਾ ਸੀ, ਜਿਸ ਸਬੰਧੀ ਥਾਣਾ ਸ਼ੰਭੂ ਜ਼ਿਲ੍ਹਾ ਪਟਿਆਲਾ ਵਿਖੇ ਮੁਕੱਦਮਾ ਨੰ: 04/2025 ਅ/ਧ 304, 3(5) ਬੀ.ਐੱਨ.ਐੱਸ 25-54-59 ਆਰਮਜ਼ ਐਕਟ ਤਹਿਤ ਮੋਟਰਸਾਈਕਲ ਖੋਹਣ ਤੋਂ ਬਾਅਦ ਦੋਸ਼ੀਆਂ ਵੱਲੋਂ ਏਅਰਪੋਰਟ ਰੋਡ ਤੇ ਉਕਤ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ ਸੀ। ਦੋਸ਼ੀਆਂਨ ਪਾਸੋਂ ਏਅਰਪੋਰਟ ਰੋਡ ਤੇ ਗੱਡੀ ਖੋਹਣ ਦੀ ਨਾਕਾਮ ਕੋਸ਼ਿਸ਼ ਤੋਂ ਬਾਅਦ ਉਸੇ ਮੋਟਰਸਾਈਕਲ ਤੇ ਸਵਾਰ ਹੋ ਕੇ, ਉਸੇ ਦਿਨ ਮਿਤੀ 08-01-2025 ਨੂੰ ਵਕਤ ਕ੍ਰੀਬ 7:15 ਏ.ਐਮ. ਤੇ ਦਲੀਪ ਕੁਮਾਰ ਵਾਸੀ ਬਾਲਾ ਜੀ ਇੰਨਕਲੇਵ ਰਾਮਗੜ੍ਹ ਰੋਡ ਸਾਹਨੇਵਾਲ ਜੋ ਕਿ ਆਪਣੇ ਘਰ ਤੋਂ ਆਪਣੀ ਫੈਕਟਰੀ ਨੂੰ ਬਰੀਜਾ ਕਾਰ ਨੰ: ਪੀ.ਬੀ.91-ਜੀ-4016 ਤੇ ਜਾ ਰਿਹਾ ਸੀ, ਜਦੋਂ ਉਹ ਡੇਹਲੋਂ ਰੋਡ ਪਿੰਡ ਉਮੈਦਪੁਰ ਨੇੜੇ ਪੁੱਜਾ ਤਾਂ ਉਕਤ ਦੋਸ਼ੀਆਂਨ ਉਸਦੀ ਬਰੀਜਾ ਕਾਰ ਅੱਗੇ ਮੋਟਰਸਾਈਕਲ ਲਗਾ ਦਿੱਤਾ ਅਤੇ ਉੱਤਰਕੇ ਹਵਾਈ ਫਾਇਰ ਕਰਕੇ ਉਸਨੂੰ ਗੱਡੀ ਦੀ ਚਾਬੀ ਦੇਣ ਲਈ ਕਿਹਾ ਅਤੇ ਉਸ ਪਾਸੋਂ ਉਸਦੀ ਕਾਰ ਖੋਹਕੇ ਫਰਾਰ ਹੋ ਗਏ ਅਤੇ ਸ਼ੰਭੂ ਤੋਂ ਖੋਹ ਕੀਤੇ ਮੋਟਰਸਾਈਕਲ ਨੂੰ ਥੋੜਾ ਅੱਗੇ ਜਾ ਕੇ ਸੁੱਟ ਦਿੱਤਾ ਸੀ, ਜਿਸ ਸਬੰਧੀ ਥਾਣਾ ਸਾਹਨੇਵਾਲ, ਕਮਿਸ਼ਨਰੇਟ ਲੁਧਿਆਣਾ ਵਿਖੇ ਮੁਕੱਦਮਾ ਨੰ: 04/2025 ਅ/ਧ 304(2), 3(5) ਬੀ.ਐੱਨ.ਐੱਸ 25/27-54-59 ਆਰਮਜ਼ ਐਕਟ ਦਰਜ ਰਜਿਸਟਰ ਹੈ। ਮਿਤੀ 09-01-2025 ਨੂੰ ਉਕਤ ਤਿੰਨੋਂ ਦੋਸ਼ੀਆਂ ਨੇ ਆਪਣੇ ਹੋਰ ਸਾਥੀ ਦੋਸ਼ੀਆਂ ਨਾਲ਼ ਮਿਲ਼ਕੇ ਵਿਦੇਸ਼ ਵਿੱਚ ਬੈਠੇ ਗੈਂਗਸਟਰ ਲਖਵੀਰ ਸਿੰਘ ਲੰਡਾ ਅਤੇ ਗੁਰਦੇਵ ਸਿੰਘ ਜੈਸਲ ਦੇ ਕਹਿਣ ਤੇ ਰਾਜੇਸ਼ ਕੁਮਾਰ ਉਰਫ ਸੋਨੂੰ ਜੋ ਕਿ ਮੁਹੱਲਾ ਆਰੀਆ ਸਮਾਜ, ਮੁਕੇਰੀਆਂ, ਜਿਲਾ ਹੁਸ਼ਿਆਰਪੁਰ ਦਾ ਰਹਿਣ ਵਾਲ਼ਾ ਹੈ ਅਤੇ ਇਸ ਸਮੇਂ ਵਿਦੇਸ਼ ਗਰੀਸ ਵਿੱਚ ਰਹਿ ਰਿਹਾ ਹੈ। ਜਿਸ ਪਾਸੋਂ ਗੈਂਗਸਟਰ ਲਖਵੀਰ ਸਿੰਘ ਉਰਫ ਲੰਡਾ ਨੇ 01 ਕਰੋੜ ਰੁਪਏ ਦੀ ਫਰੌਤੀ ਮੰਗੀ ਸੀ। ਰਾਜੇਸ਼ ਕੁਮਾਰ ਉਰਫ ਸੋਨੂੰ ਵੱਲੋਂ ਫਰੌਤੀ ਦੀ ਰਕਮ ਨਾ-ਦੇਣ ਤੇ ਉਸਦੇ ਘਰ ਮੁਹੱਲਾ ਆਰੀਆ ਸਮਾਜ, ਮੁਕੇਰੀਆਂ ਵਿਖੇ ਉਕਤ ਦੋਸ਼ੀਆਂਨ ਨੇ ਆਪਣੇ ਹੋਰ ਸਾਥੀ ਦੋਸ਼ੀਆਂ ਨਾਲ ਮਿਲਕੇ ਖੋਹ ਕੀਤੀ ਬਰੀਜਾ ਕਾਰ ਤੇ ਸਵਾਰ ਹੋ ਕੇ, ਉਸਦੇ ਘਰ ਅੰਧਾ-ਧੁੰਦ ਗੋਲ਼ੀਆਂ ਚਲਾਈਆਂ ਸਨ। ਜਿਸ ਸਬੰਧੀ ਥਾਣਾ ਮੁਕੇਰੀਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ ਵਿਖੇ ਮੁਕੱਦਮਾ ਨੰ: 05/2025 ਅ/ਧ 109, 351 (2) ਬੀ.ਐੱਨ.ਐੱਸ 25-54-59 ਆਰਮਜ਼ ਐਕਟ (Arms Act) ਦਰਜ ਰਜਿਸਟਰ ਹੈ। ਉਹਨਾਂ ਦੱਸਿਆ ਕਿ ਦੋਸ਼ੀ ਨਿਮਨਲਿਖਤ ਮੁੱਕਦਮਿਆਂ ਵਿੱਚ ਵੀ ਲੋੜੀਂਦੇ ਹਨ। ਜਿਨਾਂ ਵਿੱਚ ਮੁਕੱਦਮਾ ਨੰ:538 ਮਿਤੀ 16-12-24 ਅ/ਧ 109, 191(3), 190, 351(2) ਬੀ.ਐੱਨ.ਐੱਸ 25-54-59 ਆਰਮਜ਼ ਐਕਟ (Arms Act) ਥਾਣਾ ਗੋਇੰਦਵਾਲ ਸਾਹਿਬ, ਜ਼ਿਲ੍ਹਾ ਤਰਨਤਾਰਨ। ਮੁਕੱਦਮਾ ਨੰ: 171 ਮਿਤੀ 25-12-2024 ਅ/ਧ 304(1) ਬੀ.ਐੱਨ.ਐੱਸ ਥਾਣਾ ਕਰਤਾਰਪੁਰ, ਜਲੰਧਰ ਰੂਰਲ। ਦੋਸ਼ੀ 04 ਦਿਨਾਂ ਦੇ ਪੁਲਿਸ ਰਿਮਾਂਡ ਅਧੀਨ ਹਨ। ਖਾਸ ਗੱਲ ਇਹ ਹੈ ਕਿ ਹੋਰ ਕੀ ਖੁਲਾਸੇ ਹੋਣਗੇ। ਫਿਲਹਾਲ ਆਉਣ ਵਾਲੇ ਸਮੇਂ ‘ਚ ਹੀ ਪਤਾ ਲੱਗੇਗਾ।
ਪੰਜਾਬ ਦੇ ਵੱਖ-ਵੱਖ ਜ਼ਿਲਿਆਂ ‘ਚ ਲੁੱਟ ਖੋਹ ਅਤੇ ਫਰੋਤੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਗੈਂਗਸਟਰ ਲਖਵੀਰ ਸਿੰਘ ਲੰਡਾ ਅਤੇ ਗੁਰਦੇਵ ਸਿੰਘ ਜੱਸਲ ਉਰਫ ਜੈਸਲ ਦੇ ਦੋ ਸਾਥੀਆਂ ਨੂੰ ਮੋਹਾਲੀ ਪੁਲਿਸ ਨੇ ਕੀਤਾ ਨਜਾਇਜ਼ ਹਥਿਆਰਾਂ ਨਾਲ ਗਿਰਫਤਾਰ : ਐਸਐਸਪੀ ਦੀਪਕ ਪਾਰਿਕ
