ਏ ਆਈ ਤਕਨੀਕ ਨਾਲ ਛਾਤੀ ਦੇ ਕੈਂਸਰ ਦੀ ਹੋ ਸਕੇਗੀ ਸ਼ੁਰੂਆਤੀ ਪਛਾਣ – ਪੀਜੀਆਈ

ਸਮਰਾਲਾ, (ਸੁਰਜੀਤ ਸਿੰਘ) ਛਾਤੀ ਦੇ ਕੈਂਸਰ ਦੀ ਸ਼ੁਰੂਆਤੀ ਪਛਾਣ ਨੂੰ ਵਧੇਰੇ ਸਟੀਕ ਬਣਾਉਣ ਲਈ ਪੀਜੀਆਈ ‘ਚ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏਆਈ) ਨਾਲ ਲੈਸ ਨਵੀਂ ਮੈਮੋਗ੍ਰਾਫੀ ਮਸ਼ੀਨ ਲਿਆਂਦੀ ਜਾਵੇਗੀ। ਇਸਦਾ ਏਆਈ ਸਾਫਟਵੇਅਰ ਮੈਮੋਗ੍ਰਾਫੀ ਤਸਵੀਰ ਦਾ ਵਾਧੂ ਵਿਸ਼ਲੇਸ਼ਣ ਕਰਕੇ ਬਹੁਤ ਛੋਟੇ ਕੈਲਸੀਫਿਕੇਸ਼ਨ ਯਾਨੀ ਕੈਲਸ਼ੀਅਮ ਦੇ ਜਮ੍ਹਾ ਹੋਣ ਦੀ ਪਛਾਣ ‘ਚ ਰੇਡੀਓਲੋਜਿਸਟ ਦੀ ਮਦਦ ਕਰੇਗਾ। ਇਹ ਬਦਲਾਅ ਸ਼ੁਰੂਆਤੀ ਕੈਂਸਰ ਦਾ ਸੰਕੇਤ ਹੋ ਸਕਦੇ ਹਨ। ਸੰਘਣੇ ਬ੍ਰੈਸਟ ਟਿਸ਼ੂ ਵਾਲੀਆਂ ਔਰਤਾਂ ‘ਚ ਇਨ੍ਹਾਂ ਦੀ ਪਛਾਣ ਚੁਣੌਤੀਪੂਰਨ ਹੁੰਦੀ ਹੈ।
ਪੀਜੀਆਈਐਮਈਆਰ ਦੀ ਪ੍ਰੋਫੈਸਰ ਡਾ. ਵੀਨੂੰ ਸਿੰਗਲਾ ਦੇ ਅਨੁਸਾਰ, ਏਆਈ ਰੇਡੀਓਲੋਜਿਸਟ ਦਾ ਵਿਕਲਪ ਨਹੀਂ ਹੋਵੇਗਾ, ਸਗੋਂ ਤਸਵੀਰ ਦੇ ਵਿਸ਼ਲੇਸ਼ਣ ‘ਚ ਦੂਜੀ ਰਾਏ ਦੇਣ ਵਾਲੀ ਤਕਨੀਕ ਦੇ ਤੌਰ ‘ਤੇ ਕੰਮ ਕਰੇਗਾ।
ਪੀਜੀਆਈ ‘ਚ ਆਯੋਜਿਤ ਏਮਜ਼-ਮੈਮਕ-ਪੀਜੀਆਈ ਦੇ ਪੰਜਵੇਂ ਮਸਕੁਲੋਸਕੈਲੇਟਲ ਅਤੇ ਬ੍ਰੈਸਟ ਇਮੇਜਿੰਗ ਕੋਰਸ ‘ਚ ਮਾਹਿਰਾਂ ਨੇ ਏਆਈ, ਐਡਵਾਂਸਡ ਇਮੇਜਿੰਗ, ਇਮੇਜ-ਗਾਈਡਿਡ ਬਾਇਓਪਸੀ, ਰੇਡੀਓਮਿਕਸ ਅਤੇ ਫੰਕਸ਼ਨਲ ਇਮੇਜਿੰਗ ਦੀ ਵੱਧ ਰਹੀ ਵਰਤੋਂ ‘ਤੇ ਚਰਚਾ ਕੀਤੀ। ਮਾਹਿਰਾਂ ਦੇ ਅਨੁਸਾਰ, ਰੇਡੀਓਲੋਜੀ ਦੀ ਭੂਮਿਕਾ ਬਿਮਾਰੀ ਦੀ ਪਛਾਣ ਦੇ ਨਾਲ-ਨਾਲ ਇਲਾਜ ਦੀ ਯੋਜਨਾ ਅਤੇ ਮਰੀਜ਼ ਦੇ ਪ੍ਰਬੰਧਨ ‘ਚ ਵੀ ਵੱਧ ਰਹੀ ਹੈ।
ਪੀਜੀਆਈ ‘ਚ ਸਿੰਥੇਸਾਈਜ਼ਡ ਮੈਮੋਗ੍ਰਾਫੀ ਦੀ ਸਹੂਲਤ ਹੈ, ਜਿਸ ਨਾਲ ਰਵਾਇਤੀ ਜਾਂਚ ਦੇ ਮੁਕਾਬਲੇ ਰੇਡੀਏਸ਼ਨ ਐਕਸਪੋਜ਼ਰ ਘੱਟ ਕਰਨ ‘ਚ ਮਦਦ ਮਿਲਦੀ ਹੈ। ਵੈਕਿਊਮ ਅਸਿਸਟਿਡ ਬ੍ਰੈਸਟ ਬਾਇਓਪਸੀ ‘ਚ ਇੱਕ ਵਾਰ ਸੂਈ ਪਾ ਕੇ ਕਈ ਟਿਸ਼ੂ ਨਮੂਨੇ ਲਏ ਜਾ ਸਕਦੇ ਹਨ। ਇਸ ਨਾਲ ਵਾਰ-ਵਾਰ ਸੂਈ ਪਾਉਣ ਦੀ ਲੋੜ ਘੱਟ ਹੁੰਦੀ ਹੈ। ਮਾਹਿਰਾਂ ਨੇ ਦੱਸਿਆ ਕਿ ਭਵਿੱਖ ‘ਚ ਏਆਈ ਦੀ ਵਰਤੋਂ ਟਿਊਮਰ ਦੇ ਮੌਲੀਕਿਊਲਰ ਸਟੇਟਸ ਦੇ ਮੁਲਾਂਕਣ ‘ਚ ਵੀ ਕੀਤੀ ਜਾ ਸਕਦੀ ਹੈ। ਫਿਲਹਾਲ ਇਸਦੇ ਲਈ ਬਾਇਓਪਸੀ ਜ਼ਰੂਰੀ ਹੈ ਅਤੇ ਰਿਪੋਰਟ ਆਉਣ ‘ਚ 10 ਤੋਂ 15 ਦਿਨ ਲੱਗ ਸਕਦੇ ਹਨ। ਏਆਈ ਆਧਾਰਿਤ ਵਿਸ਼ਲੇਸ਼ਣ ਭਵਿੱਖ ‘ਚ ਇਹ ਸਮਾਂ ਘੱਟ ਕਰਨ ‘ਚ ਮਦਦ ਕਰ ਸਕਦਾ ਹੈ। ਹਾਲਾਂਕਿ, ਇਹ ਵਰਤੋਂ ਅਜੇ ਸੰਭਾਵਿਤ ਪੱਧਰ ‘ਤੇ ਹੈ।
ਮਸਕੁਲੋਸਕੈਲੇਟਲ ਇਮੇਜਿੰਗ ‘ਚ ਇਮੇਜ-ਗਾਈਡਿਡ ਇੰਟਰਵੈਨਸ਼ਨ ‘ਤੇ ਚਰਚਾ ਹੋਈ। ਪੀਜੀਆਈ ‘ਚ ਕੁਝ ਹੱਡੀ ਦੇ ਟਿਊਮਰ ਦੇ ਇਲਾਜ ‘ਚ ਰੇਡੀਓਫ੍ਰੀਕੁਐਂਸੀ ਐਬਲੇਸ਼ਨ ਅਤੇ ਕ੍ਰਾਇਓਐਬਲੇਸ਼ਨ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਏਮਜ਼, ਮੈਮਕ ਅਤੇ ਪੀਜੀਆਈਐਮਈਆਰ ਦੀ ਅਕਾਦਮਿਕ ਲੜੀ 1996 ‘ਚ ਸ਼ੁਰੂ ਹੋਈ ਸੀ। ਇਸ ਤੋਂ ਬਾਅਦ 2000, 2005, 2013 ਅਤੇ 2020 ‘ਚ ਆਯੋਜਨ ਹੋਏ। ਇਸ ਵਾਰ ਦੇਸ਼ ਭਰ ਦੇ ਰੇਡੀਓਲੋਜਿਸਟ, ਪੀਜੀ ਰੈਜ਼ੀਡੈਂਟ, ਫੈਕਲਟੀ ਅਤੇ ਡਾਕਟਰਾਂ ਨੇ ਹਿੱਸਾ ਲਿਆ। ਪ੍ਰੋਗਰਾਮ ‘ਚ ਕੇਸ ਆਧਾਰਿਤ ਚਰਚਾ, ਫਿਲਮ ਰੀਡਿੰਗ, ਕੁਇਜ਼ ਅਤੇ ਆਧੁਨਿਕ ਇਮੇਜਿੰਗ ਤਕਨੀਕਾਂ ‘ਤੇ ਸੈਸ਼ਨ ਹੋਏ।